اہل بیت(ع) نیوز ایجنسی۔ابنا۔ ایران کے مرجع تقلید آیت اللہ مکارم شیرازی نے آج قم المقدسہ کی مسجد اعظم میں اپنے درس کے آغاز پر کہا: جو کچھ آج یمن میں ہو رہا ہے اسے طاقت کے جنون کے علاوہ کچھ نہیں کہا جا سکتا۔
انہوں نے اس بات کی طرف اشارہ کرتے ہوئے کہ عربی حکام کا ایک ٹولہ آپس میں مل کر ایک عربی اور اسلامی ملک کو ویران کرنے پر تلا ہوا ہے کہا: صاف واضح ہے کہ عربی حکام کا یہ ٹولہ امریکہ اور اسرائیل کا مزدور ہے۔
شیعوں کے مرجع تقلید نے اس بات کو بیان کرتے ہوئے کہ ایک دن میں سعودی جنگی طیارے سو سے زیادہ یمن کی مختلف جگہوں پر بموں کی بارش کریں کہا: انسان کو تعجب ہوتا ہے کہ وہ کس دنیا میں جی رہا ہے طاقت اور قدرت کا جنون رکھنے والے مٹھی بھر افراد جنہیں اسلام، غیریت اور انسانیت کی بو تک نہیں آئی یہ کارنامہ انجام دے رہے ہیں۔
آیت اللہ مکارم شیرازی نے کہا: ان کے کارنامے صرف امریکہ اور اسرائیل کے مفاد میں ہیں، افسوس کی بات یہ ہے کہ عالمی برادری یوں خاموش ہے کہ گویا مر چکی ہے اور اسے دنیا کی کوئی خبر ہی نہیں ہے! اگر دنیا کے کسی کونے میں اسرائیل کے خلاف ایک برا لفظ بھی کوئی کہہ دے تو کتنا شور شرابا مچ جاتا ہے لیکن آباد ملک کو اجاڑا جا رہا ہے اور سب تماشا دیکھ رہے ہیں!
انہوں نے زور دے کر کہا: یہ چیز اس بات کا باعث بنے گی کہ ان بین الاقوامی مراکز سے سب کی امیدیں ختم ہو جائیں اور سب کو یقین ہو جائے گا کہ یہ تمام مراکز استمعاری طاقتوں کے چیلے ہیں۔
اس مرجع تقلید نے یہ بیان کرتے ہوئے کہ سعودی تیل کے ڈالر ان سب کی جیبوں میں جاتے ہیں کہا: اقوام متحدہ سے لے کر میڈیا اور مختلف حکومتوں تک سب پر سکوت طاری ہے اور اس سکوت کے سامنے المناک جرائم کا ارتکاب کیا جا رہا ہے۔
آیت اللہ مکارم شیرازی نے کہا: پروردگار عالم کا دست انتقام آخر کار اس کی عدالت کی آستین سے نکلے گا اور ان ظالم، جابر اور خون کے پیاسے حکمرانوں کو ذلت کی خاک پر اوندھے منہ مارے گا۔
۔۔۔۔۔۔۔۔۔۔۔۔۔۔۔
