اہل بیت(ع) نیوز ایجنسی۔ابنا۔ ایران و عراق سمیت دنیا کے مختلف ممالک میں آج رسول اللہ (ص) کے نواسے حضرت امام حسین (ع) اور آپ کے اصحاب و انصار کا چہلم منایا گیا۔ دسیوں لاکھ زائرین چہلم امام حسین (ع) کے اجتماعات میں شرکت کے لئے عراق کے مقدس شہر کربلا پہنچے ہیں۔ اطلاعات کے مطابق دنیا کے 60 ممالک کے زائرین اور عزادار چہلم کے سلسلے میں کربلا پہنچے ہیں جن میں بہت بڑی تعداد ایرانی زائرین کی ہے۔ کربلا سے موصولہ رپورٹ کے مطابق حضرت امام حسین (ع) اور حضرت عباس (ع) کے روضے، دونوں روضوں کا درمیانی علاقہ بین الحرمین اور شہر کی سڑکیں اور گلی کوچے عراقی اور بیرونی زائرین اور عزاداروں سے مملو ہیں جو عزاداری امام حسین میں مصروف ہیں۔ کربلائے معلیٰ میں زائرین کے امور کے عہدہ داروں نے بتایا ہے کہ عراق کے مختلف علاقوں اور دیگر ممالک سے تقریباً دو کروڑ زائرین کربلا پہنچ چکے ہیں۔ اطلاعات کے مطابق ایران سے تیرہ لاکھ سے زیادہ زائرین امام حسین (ع) کے چہلم کے اجتماعات میں شرکت کے لئے عراق گئے ہیں جن میں اکثر عراق کی سرحد میں داخل ہونے کے بعد پیدل کربلا کی طرف روانہ ہوئے ہیں۔ اس کے علاوہ داعش گروہ کے حملوں کے خطرے کی پرواہ کئے بغیر عراق کے مختلف علاقوں سے بھی بہت بڑی تعداد میں زائرین اور عزادار کئي دن کی مسافت طے کرکے پیدل کربلا پہنچے ہیں اور یہ سلسلہ ابھی جاری ہے۔
عراق کے وزیر دفاع خالد العبیدی نے کربلا کے مختلف مقامات کا دورہ کرنے کے بعد کہا ہے کہ اس سال کربلا میں تقریبا دو کروڑ عزاداروں نے حاضری دی ہے۔
واضح رہے کہ تاریخ بشریت کا سب سے بڑا اجتماع، اربعین کے موقع پر کربلا میں منعقد ہوتا ہے جو اس سال دھشتگرد ٹولے داعش کی دھمکیوں کے بعد اور زیادہ زور و شوق سے منعقد ہوا۔ دنیا آئے اور پہنچانے کہ حسین (ع) کون ہے دو کروڑ انسان ایک دن میں جس کے حرم کے اطراف میں پروانوں کی طرح طواف کررہے ہیں اور گریہ و ماتم کے ساتھ اپنی عقیدت کا اظہار کر رہے ہیں۔
